ЮИДлылар бездә кунакта
Бүгенге балалардан грамоталы һәм дисциплиналы юл хәрәкәтендә катнашучылар үсеп чыксыннар дисәң,балаларны юлда дөрес тәртипкә өйрәтү балачактан ук кирәк. Велосипедта һәм роликларда йөрү кагыйдәләрен, светофор сигналлары нәрсәне аңлата, юлларда үзеңне ничек дөрес тотарга? Бу һәм башка сорауларга җавапларны 21 сентябрь көнне юл хәрәкәте куркынычсызлыгы атналыгының профилактик чаралары кысаларында тәрбияләнүчеләребезгә ЮХИДИнең яшь ярдәмчеләре – Теләче урта гомуми белем мәктәбенең ЮИД отряды искә төшерде, алар балалар бакчасына җитәкче Гатиятов Р.Р. белән кунакка килделәр. Мәктәп укучылары яшь инспекторларның якты формасында, юл билгеләре макетлары белән коралланып, балаларга юл хәрәкәте кагыйдәләренә багышланган чыгыш күрсәттеләр. Чыгыштан соң ЮИДлылар "Минем дустым - велосипед"дәресен үткәрделәр. Балалар велосипедның барлыкка килү тарихын, аларның нинди төрләре барлыгын белделәр. Велосипедчының иминлеге һәм сакланышы каралды. Велосипедның төзеклеген күзәтү никадәр мөһим дигән сорауны игътибарсыз калдырмадылар. Очрашу бик файдалы, кызыклы булды һәм уңай эмоциональ фонда узды, барысы да - балалар да, без дә - педагоглар да канәгать калды.