21 февраля, в Международный день родного языка, в районном Доме культуры состоялся литературно-музыкальный вечер “Туган телдән көч, дәрт алып типсен синең йөрәгең”.
Әлеге кичәгә район Башкарма комитеты җитәкчесенең социаль мәсьәләләр буенча урынбасары Гыйниятуллин Динар Сәет улы, мәктәп укучылары, укытучылар, китапханәчеләр, әдәбият сөючеләр, туган телебезгә гашыйк укучыларыбыз чакырулы иде. Туган тел бәйрәмендә мәртәбәле кунаклар Теләче үзәк китапханәсе каршында эшләп килүче “Йөзек кашы” әдәбият-сәнгать иҗат берләшмәсенең актив әгъзалары Фаягөл Фатхуллина, Сиринә Гатиятова, Дамирә Миннебаева, Рузалия Газизова, Илһам Якупов, Илсаф Тимербайевлар катнашты. Берләшмәнең оешуына күз салсак, ул 1996 елның 1 ноябреннән үз эшчәнлеген башлап җибәрә. Аның оештыручылары булып Татарстанның атказанган укытучылары Тәнзилә Шәрәфиева, Равил Гәләвиев, Татарстанның атказанган мәдәният хезмәткәре Ризидә Дәүлиева, Татарстан Республикасының атказанган матбугат һәм массакүләм мәгълүмат чаралары хезмәткәре Фәнил Нигъмәтҗановлар тора. Кичәдә берсеннән –берсе талантлы иҗат әһелләре хатирәләре белән уртаклаштылар һәм иҗат җимешләрен укучыларга тәкъдим иттеләр. Аларны шулай ук районыбызның иң оста сүз осталары тамашачыларга җиткерделәр. Бәйрәмне үзешчәннәребезнең аһәңле моңлы җырлары, дәртле биюләре бизәде. Чара барышында талантлы яшьләребез Фәридә Җәббәрова һәм Камил Минһәҗевлар “Йөзек кашы” әдәбият-сәнгать иҗат берләшмәсенә кабул ителделәр.