19 март көнне Теләче үзәк китапханәсендә изге Рамазан аена багышланган «Изге айның һәр көне изгелеккә безне чакыра» дип исемләнгән рухи мәгълүмат сәгате үткәрелде.
Бирегә «Сердәш» клубы әгъзалары чакырулы иде. Әле яңа гына Гомрә хаҗыннан кайткан мөслимә кардәшебез Әнисә Хуҗина үзенең уй-кичерешләре белән уртаклашты, Мәккә һәм Мәдинә шәһәрләрендәге изге урыннарны видео һәм фото материаллар аша күрсәтте. «Без – мөселманнар, бергә җыелып илебез җитәкчеләренә сабырлык, ихтыяр көче юлдаш булуын теләдек. Аллаһы Тәгаләдән Украина җирендә тынычлык урнашуын һәм ир-егетләребезнең исән-сау өйләренә әйләнеп кайтуларын сорап дога кылдык», - диде ул.
Әнисә ханым хаҗга барырга җыенучы мөслимәләргә киңәшләрен дә бирде: «Әгәр ихлас, саф күңел белән хаҗ кылырга ниятләсәгез, Аллаһы Тәгалә җаен бирә, юлын күрсәтә ул. Хаҗга бару өчен иң элек рухи яктан тулысынча әзер булу таләп ителә. Сабырлык, түземлек – мөселманны бизәүче күркәм сыйфатларның берсе. Шулай ук физик яктан әзерлекле булу да мөһим, чөнки хаҗ йоласын башкарганда байтак араны җәяү үтәргә туры килә», - диде.
Шулай ук китапханәдә «Рамазан ае – изге ай» дип исемләнгән китап күргәзмәсе оештырылды. Күргәзмәдә Р. Фәхреддиннең «Нәсыйхәт», Г. Тукайның «Аллаһ гыйшкына», Җәлил хәзрәт Фазлыевның китаплары, С. Аппакованың «Тузмый торган бүләк» һ.б китаплар урын алды.