«Эбру-матурлык дөньясы» исемле мастер - класс үткәрелде.
«Пушкин картасы» проекты кысаларында Теләче үзәк китапханәсенең уку залында Теләче урта мәктәбенең 7 «А» сыйныфы укучылары өчен «Эбру-матурлык дөньясы» исемле мастер - класс үткәрелде.
Эбру - безгә Көнчыгыштан килгән һәм үзенең уникальлеге белән дөньяны яулап алган суда рәсем ясауның тылсымлы техникасы. Әмма су да гади түгел, ул гевен үсемлеге сумаласыннан ясалган порошок белән куертыла. Суны дөрес итеп ясау да зур осталык сорый. Рәсем ясалып беткәч, су өстенә кәгазь салып, аны сак кына «тартып» чыгаралар. Сурәтне кәгазьгә күчерү бик җиңел кебек тоела, ләкин нәкъ менә шушы гадилектә Эбруның үзенчәлеге яшеренгән дә инде. Мондый гадәти булмаган мастер-класс зур тырышлык һәм сабырлык таләп итә. Әлеге чарада катнашучылар оригиналь, искиткеч матур рәсем ясауның бөтен нечкәлекләрен өйрәнделәр, гаҗәеп картиналар иҗат иттеләр.