27 мартта Россия мәдәни бәйрәмнәрнең берсен - Халыкара театр көнен билгеләп үтә.
Халыкара театр көне - сәхнә осталарының профессиональ бәйрәме генә түгел, ул миллионлаган тамашачыларның да бәйрәме. Театр – милләт язмышының һич тутыкмас көзгесе ул. Бик күп еллар дәвамында татар милләтенең рухын, телен, әхлагын саклап һәм үстереп, безне бербөтен халык итеп тотучы татар театры һичшиксез, олы ихтирамга, чиксез мәхәббәткә лаек. Әлеге көн уңаеннан, Айдар авылы китапханәсендә 27-28 март көннәрендә «Якташларыбыз театр сәхнәсендә» дип исемләнгән күргәзмә куелды һәм аралашу сәгате үткәрелде. Яшьләргә бәйрәмнең үткәрелү тарихы сөйләнде. Алар Илнар Низамиев, Харис Хөснетдинов, Алмаз Фәтхуллин, Роберт Галиев кебек танылган артистларыбызның тормышы һәм иҗаты турында белделәр. Әлеге очрашуның максаты: районыбызның танылган якташлары белән таныштыру, аларның эшчәнлекләре һәм ватан алдындагы казанышлары турында белемнәрне киңәйтү, туган якка мәхәббәт тәрбияләү.