Китап бәйрәме - барлык китап укучы балалар бәйрәме, балачак бәйрәме, язучылар һәм китапханәчеләр өчен бәйрәм.

Бу бәйрәм - китапка гашыйк, кызыксынучан балалар һәм өлкәннәр, яңа әдәби ачышлар һәм күңелле маҗаралар бәйрәме дә.                                           2 апрель көнне бөтен дөньяда Халыкара балалар китабы көне билгеләп үтелә. Ә аның төп максаты - укуны популярлаштыру, яшь буынны китап укуга җәлеп итү. Әлеге көн уңаеннан Айдар авылы китапханәсе «Менә шундый дуслар без: китапханә, китап, мин!» дип исемләнгән китап кычкырып укулары оештырды. Кычкырып уку – сөйләмне үстерү өчен иң яхшы күнегүләрнең берсе. Китапханәче балаларга бәйрәм тарихы турында сөйләде,  шагыйрь - язучыларның  китаплары белән таныштырды. Балалар кычкырып уку өчен үзләре теләгән китапларны сайладылар. Һәрберсе әсәрне укыганнан соң, әсәр турындагы фикерләре белән уртаклаштылар, бергәләп геройларның характерларына һәм алар кылган эшләргә  нәтиҗә ясадылар.                                                                                                     Чара ахырында һәр укучы өйдә уку өчен китаплар сайлады. Мондый чаралар балаларны күбрәк укырга кызыксындыра, теләп укырга өнди, чөнки укыган һәр китап гаҗәеп белем һәм маҗаралар дөньясына ишек ача.