«Планетаны чиста тотыйк»
18 апрель көнне Теләче балалар китапханәсендә «Планетаны чиста тотыйк» дигән темага экологик әңгәмә үткәрелде. Чарага 1 нче номерлы «Аленушка» балалар бакчасында тәрбияләнүчеләр, «Шаркылдыклар» клубы әгъзалары килде.
Мәктәпкәчә яшьтәге балалар экологиянең табигать законнары турындагы фән икәнен белделәр. Балалар геройлары хайваннар, үсемлекләр һәм хәтта табигать күренешләре булган әкиятләрне искә төшерделәр. Нәниләр шулай ук, үзләренең белемнәрен, зирәклекләрен һәм тапкырлыкларын күрсәтеп, бик теләп әкияти викторинада катнаштылар.
Экологик әкиятләр кешене тере табигатькә сакчыл карарга өйрәтә, әйләнә-тирә дөнья, яхшылык һәм яманлык белән таныштыра, табигать турында, хайваннарның гадәтләре, кешеләрнең хайваннар һәм үсемлекләр дөньясы белән үзара мөнәсәбәтләре турында белем бирә, алар кешедә табигатькә карата сакчыл караш формалаштыруга юнәлдерелгән.