«Җиңү юллары»
19 апрель көнне, Бөек Ватан сугышы елларында нацистлар һәм аларның булышчылары тарафыннан совет халкына карата геноцид (юк итү) үткәрү истәлегенә Бөтенроссия бердәм хәрәкәтләр көне билгеләп үтелә. Шул уңайдан, Теләче балалар китапханәсендә «Җиңү юллары» дип исемләнгән патриотик дәрес үткәрелде. Анда Алан урта мәктәбенең 6-7 нче сыйныф укучылары катнашты.
Балаларга тыныч гражданнарга карата җинаятьләрнең масштабын һәм характерын аңларга, «геноцид» төшенчәсен тулысынча ачарга булышкан «Искерү срогы булмаган» дигән документаль фильм күрсәтелде. Фильм караганнан соң фикер алышулар узды.
Бөек Ватан сугышы елларында илебез кичергән корбаннарны истә тоту һәм бу хәтернең үсеп килүче буын белән эшләүдә әһәмиятлеген җиткерү мөһим. Тарихи вакыйгаларга багышланган чаралар укучыларга илнең героик үткәне турында күбрәк белергә ярдәм итә, Ватанга мәхәббәт, үз халкы өчен горурлык тәрбияли.