«Бердәм гамәлләр көне»
19 апрельдә Россиядә Бөек Ватан сугышы вакытында совет халкы геноциды корбаннары истәлегенә багышланган «Бердәм гамәлләр көне» Бөтенроссия акциясе уза. Бердәм гамәлләр көне - тарихи дөреслекне саклау һәм киләчәктә мондый фаҗигаләрнең кабатлануына юл куймау мөһимлеген искә төшерү. Әлеге көн уңаеннан 18 апрель көнне Айдар авылы китапханәсендә мәдәният йорты белән берлектә «Тормышның өзелгән җебе» дип исемләнгән хәтер сәгате үткәрелде. Мәгълүмати материаллар укучыларга фаҗиганең масштабын тирәнрәк аңларга, совет халкына кичерергә туры килгән авырту һәм газапларны аңларга ярдәм итте. Чарада катнашучыларга «геноцид» сүзенең мәгънәсе һәм ул сугыш елларында кемгә юнәлдерелгән булуын искә төшерделәр. Шулай ук, Бөек Ватан сугышы елларында совет халкына ниләр кичерергә туры килүе, фашистлар әсирлегенә эләккән кешеләргә нинди авыр сынаулар төшүе, кешеләрне аяусыз кырып бетерү, тарихи хакыйкатьне саклау кирәклеге турында сөйләнде.