ЯҢАЛЫКЛАР
2022 елның 31 гыйнварыннан 2 февраленә кадәр татар мәктәпләрендә белем алучы укучылар арасында татар әдәбиятыннан республика олимпиадасының йомгаклау этабы узды. Безнең район данын Югары Кибәхуҗа, Шәтке, Олы Нырсы урта һәм Баландыш төп мәктәпләреннән 5 укучы яклады. Баландыш төп мәктәбенең 9 сыйныф укучысы Гыйләҗева Таңчулпан (укытучысы Зәйнуллина Рушания Хәким кызы) һәм Олы Нырсы урта мәктәбенең 10 сыйныф укучысы Шәйхетдинова Динә (укытучысы Мөбинова Гөлнара Гаптелмәннаф кызы) призер исеменә лаек булдылар. Котлыйбыз!
Югары Кибәхуҗа авылы мәдәният хезмәткәрләре Рафис Корбанга 65 яшь тулу уңаеннан мәктәп укучылары өчен "Талантлы нечкә күңелле шагыйрь" дип исемләнгән әдәби дәрес үткәрде. Укучылар игътибарына шагыйрьнең иҗатына, китапларына багышлап төзелгән китап күргәзмәсе тәкъдим ителде, шигырьләре кычкырып укылды.
2022 елның 1 февралендә мәгариф бүлеге начальнигы Карпова Наталья Владимировна, Теләче үзәк хастаханәсенең педиатрия бүлеге мөдире Исмәгыйлова Рәшидә Мөхәммәтхан кызы белән берлектә районның барлык белем бирү оешмаларының директорлары, тәрбия эшләре буенча урынбасарлары һәм ата-аналар комитеты рәисләре белән видеоконференция узды. Әлеге конференция Covid-2019 һәм мәктәп яшендәге балаларны вакцинацияләү темасына кагылды. Рәшидә Мөхәммәтхановна «Үзеңне авырудан ничек сакларга», «Саклану чаралары» дигән темага профилактик әңгәмә үткәрде. Балаларны вакцинацияләүнең барлык нечкәлекләрен аңлатты.
Әбде авыл китапханәсе 1 февральдә «По дорогам зимних сказок» дип исемләнгән әдәби викторина үткәрде. Балалар «Кышкы әкиятләр» конкурсында катнаштылар, «По щучьему веленью», «Зимовье зверей», «Двенадцать месяцев» һ.б. әкиятләрне искә төшерделәр. Укучылар рус һәм чит ил әкиятләре буенча бик яхшы белемнәрен күрсәттеләр. Соңыннан «Снежные сказки волшебной зимы» дип исемләнгән китап күргәзмәсенә күзәтү ясадылар.
Ачы авыл китапханәсе китап уку тылсымына кушылырга һәм Яңа елны яңа китап белән башларга чакыра! Китапханәдә "Яңа елга яңа китап белән" дигән яңа китаплар күргәзмәсе ачылды.
Күргәзмәдә төрле жанрдагы китаплар тәкъдим ителде. Бу заманча детективлар, хатын-кызлар романнары, маҗаралар, әкиятләр, фантастика.
Барлык укучыларны уку тылсымына кушылыгыз һәм Яңа елны сезнең тугры дусларыгыз — китаплар белән каршылагыз!
27 гыйнвар – Холокост корбаннарын, ягъни ерткыч сәясәт корбаннары булганнарны һәм бу мәшхәрне туктаткан батыр йөрәкле кешеләрне искә алу көне. Шул уңайдан Алан авылы китапханәсендә мәдәният йорты белән берлектә, “Онытма, истә тот!” дип исемләнгән хәтер сәгате үткәрелде һәм шул исемдәге китап күргәзмәсе әзерләнде.
Яшьләр арасында мөстәкыйль фикерләүне үстерү,үз-үзеңне тәрбияләү,сәламәт яшәү рәвеше булдыру,физик активлыкны арттыру өстендә эшләргә өндәү- китапханәнең төп бурычларының берсе булып тора. 26 гыйнварда Алан авылы китапханәсендә “Сәламәтлек-һәр гаиләнең нигезе” исемле күргәзмә оештырылды һәм буклетлар ясалды.Көн дәвамында китапханәгә килүчеләр үзләренең белемнәре белән бүлештеләр,шәхси режимнары турында сөйләделәр, сәламәтлек турында фикерләрен белдерделәр.
1945 елның 27 январендә совет гаскәрләре Освенцим концлагерен (хәзерге Польша территориясендә) азат итә. Шул уңайдан 29 январь көнне Олы Мәтәскә авылы мәдәният хезмәткәрләре төрле сыйныф укучылары белән “Холокост - буыннар хәтере”дип исемләнгән патриотик сәгать үткәрделәр. Укучыларга бу көн турында аңлату эшләре алып барылды.
Баландыш мәдәният йортында, Баландыш авылы җирлегенең отчет җыелышы булды. Бу массакүләм чарада, Урта Мишә авылы китапханәчесе Мухаметшина Г.И. китапханәнең 2021 елгы эшчәнлеге турында презентация әзерләде һәм шул турыда чыгыш ясады.
Югары Кибәхуҗа авылы китапханәчесе Төрек -Тәмте авылында булып, халыкны яңа китаплар, матбугат яңалыклары белән таныштырды. Китап укучылар ошаган китапларны укырга алып калды.