ЯҢАЛЫКЛАР
22 апрель көнне Ачы мәдәният йортында “Авылыбызны матурлыйк” дигән акция үткәрелгән. Әлеге акциядә авылның яше-карты, мәктәп балалары да катнашкан.
Ачы мәдәният йортында кече яшьтәге мәктәп балалары даими “Заря” дип исемләнгән кул эшләре берләшмәсенә йөриләр.
26 апрель көнне мәдәният һәм ял паркында бөек татар шагыйре Г. Тукайның тууына 130 ел тулуга багышланган “Тукай язы – шигъри яз”, дигән бәйрәм чарасы уздырылды. Анда Теләче балалар китапханәсе дә актив катнашты. Күргәзмә - стендларны балалар рәсемнәре белән бизәү, китап күргәзмәсе оештыру, төрле бәйгеләрдәге иң яхшы эшләрне һәм чыгышларны сайлап алу белән шөгыльләнде, шунда ук “Яшь рәссамнәр аллеясы” эшләтеп җибәрде. Бәйрәмдә күбесе төрле номинацияләрдә җиңү яулаган 300 дән артык бала һәм өлкән кеше катнашты. Мондый чаралар үткәрү балаларга якташ язучыларыбыз иҗатына тартылырга булыша, Туган илгә мәхәббәт, туган халкына карата горурлык хисләре тәрбияли.
25 апрель көнне Теләче балалар китапханәсенең “Гөрләвек” клубы әгъзалары “Шатлык” балалар бакчасында “Дюймовочка” курчак театры спектакле белән чыгыш ясадылар. Нәниләр иртә яшьтән үк таныша торган әлеге сәнгать төре, балаларның иң яраткан тамашасы булып санала.
Биредә кечкенәләр әкият геройлары артыннан чын күңелдән күзәттеләр, алар белән бергәләп кайгырдылар һәм шатландылар.
Театраль уеннар һәм спектакльләр балаларга зур кызыксыну һәм җиңеллек белән хыял дөньясына кереп чумарга мөмкинлек бирә, аралашучан һәм игелекле булырга өйрәтә. Шулай ук кайгыртучанлык, ярдәм итү теләге барлыкка килеп, спектакльдәге персонажларның хәрәкәтләренә хис, тойгылар белән җавап бирергә, кылган гамәлләренә сыйфатлама бирергә өйрәнәләр.
26 апрель көнне Теләче ял паркында татарның бөек улы – Габдулла Тукайның тууына 130 ел тулу уңаеннан шагыйрьне, аның иҗатын хөрмәт итүче райондашларыбыз катнашында зур бәйрәм булды. Бәйрәм башында ук Тукай маршы яңгырап торды, сөекле шагыйребез китапларыннан, район күләмендә балалар арасында уздырылган рәсемнәрдән торган күргәзмәләр эшләде, Г.Тукай иҗаты буенча рәсем ясау конкурсы уздырылды. Бәйрәм шагыйрьнең шигырьләрен уку бәйгесе белән башланып китте: балалар берсеннән –берсе матуррак итеп Тукаебызның әсәрләрен тамашачыларга җиткерделәр. Балалар милләтебез көзгесе булган Габдулла Тукайга багышланган һәм үзләре иҗат иткән шигырьләр, шагыйрьнең шигырьләренә язылган җырлар башкару бәйгеләрендә катнаштылар.
22 апрель көнне Теләче җирлекара китапханәсендә Кино елы һәм Г.Тукайның 130 еллыгы уңаеннан Теләче мәктәбенең 8 сыйныф укучылары өчен әдәби дәрес уздырылды. Монда шулай ук татар теле һәм әдәбияты укытучылары Ибрагимова Г.М. һәм Якупова Л.М. да катнашты. Укучылар китапханәдә әзерләнгән презентация ярдәмендә район һәм китапханә тарихы белән таныштылар, Г.Тукайга багышланган интеллектуаль уенда катнаштылар. Җиңүчеләргә истәлек бүләкләре – китаплар тапшырылды.
Казаклар авылы китапханәчесе Альбина Рахматуллина борынгы йолаларны, гореф – гадәтләрне балаларга тапшыру максатыннан Олы Кибәхуҗа “Шатлык” балалар бакчасы балалары белән “Йомырка җыю” йоласын үткәрде. Бәйрәм милли уеннар, җырлар белән бергә үрелеп барды. Бәйрәм ахырында балалар яңа кайткан китаплар белән таныштылар. Алар бу бәйрәмнән бик канәгать калдылар.
Айдар авылы китапханәсе "Язгы шәфкатьлелек атнасы - Мәрхәмәтле Татарстан" акциясендә катнашты. Әлеге акция кысаларында мәдәният йорты хезмәткәрләре белән берлектә обелиск янына куаклар утыртылды, юл кырыйлары чүптән арындырылды, җир көненә багышлап мәгълүмати стенд булдырылды. Стендта җир көнен уздыруның килеп чыгышы, җирнең иң суык һәм җылы урыннары, җир планетасының нидән торуы турында мәгълүматлар, шигъри формада теләкләр урнаштырылды.
28 апрель көнне Шармыш авылында зур өмә оештырылды. Авылның мәдәният һәм мәгариф хезмәкәрләре мәктәп балалары белән берлектә чиркәү һәм П.Г.Пятницкий кабере тирәләрен тырмалап, чүп-чардан чистартты. Шулай ук авылның юл кырыйларындагы чүпләр дә җыелды. Мондый күмәк эш яшьләрне тәрбияләүнең бер чарасы булып тора.
Айдар авылы китапханәсендә дә Г.Тукайның 130 еллыгына багышлап "Моң йомгагын сүтә-сүтә, ил буйлап йөри Тукай" дип исемләнгән шигырь бәйрәме үткәрелде, шагыйрь иҗатын яктырткан "Милләтемнең җырчы тургае" исемле презентация күрсәтелде. Җиңүчеләргә грамоталар һәм истәлекле бүләкләр тапшырылды.