1 апрельдән Татарстанда «ЭКОяз-2025» республика акциясе һәм санитар - экологик икеайлыгы башланды.
Шул уңайдан, 4 апрель көнне әлеге акциягә Сауш авылы китапханәчесе дә кушылды, шулай ук авыл активистлары да читтә калмады. Акциядә катнашучылар уртак көч белән мәдәният йорты территориясен чистарттылар: чүп-чар җыйдылар, газоннарны чистарттылар, яфракларны һәм коры ботакларны җыештырдылар. Чарада олысы да, кечесе дә бик теләп катнашты. Барысы да зур энтузиазм белән эшләделәр, һәркем бу эшкә үз җылысын кертте, китапханәнең чиста территориясе тирә-юньдәгеләрнең күзләрен сөендереп калдырды. Балаларның активлыгын күзәтү аеруча күңелле булды, мондый чаралар вакытында аларда коллективта эшли белү һәм табигатькә сакчыл караш формалаша. Барлык катнашучылар да: «Өмә - кирәкле һәм файдалы эш», - дигән нәтиҗәгә килделәр. Ахырда экологик өмәдә катнашучыларның барысына да рәхмәт сүзләре җиткерелде.