Ел саен 7 апрельдә Бөтендөнья сәламәтлек көне билгеләп үтелә.
Сәламәтлек - кешенең иң мөһим тормыш кыйммәтләренең берсе. Әлеге көн уңаеннан, Айдар авылы китапханәсендә «Сау-сәламәтлек булсын иде һәркем, киләчәктә якты дөньяда!» дип исемләнгән мәгълүмати сәгать үткәрелде. Сәламәтлек күп очракта кешенең үзеннән һәм яшәү рәвешеннән тора.
Чара барышында китапханәче катнашучыларга сәламәт яшәү рәвешенең әһәмияте, аның кыйммәтләре, һәр кеше тормышындагы роле турында сөйләде. Алар белән сәламәт туклану һәм үләннәрнең, җиләк-җимешләрнең, яшелчәләрнең шифалы үзлекләре турында сөйләшенде, физкультура һәм спорт белән шөгыльләнүнең сәламәтлек өчен бик файдалы булуы билгеләп үтелде, шулай ук алар үзләренең белемнәре, көн тәртибе белән уртаклаштылар. Чара ахырында катнашучылар табышмакларга җаваплар бирделәр, сәламәтлек турындагы мәкальләрне искә төшерделәр, сәламәтлек һәм сәламәт яшәү рәвеше кагыйдәләре турында шигырьләр укыдылар, «Спорт һәм туклану», «Төрле төстәге өстәлләр», «Мәкальне төгәллә» кебек конкурсларда актив катнаштылар.