26 апрельдә татар халкы бөек шагыйребез Габдулла Тукайның туган көнен билгеләп үтә.
Башка бәйрәмнәр һәм истәлекле даталар белән беррәттән, бу көн һәркайсыбызның күңелендә аерым урын биләп тора. «Туган телеңне онытсаң, рухыңны югалтырсың…» – дип язган шагыйрь. Сөекле шагыйребезнең 139 еллыгы уңаеннан, 24 апрель көнне Теләченең «Киләчәк» Яшьләр үзәгендә «Без – Тукай оныклары» дип исемләнгән шигърият бәйрәме үткәрелде. Балалар бөек шагыйребезнең шигырьләрен бик теләп яттан сөйләделәр. Тукайның шигырьләре, көйгә салынган җыр кебек, безне еларга, көләргә, уйланырга мәҗбүр иттеләр, хәтта алар күп гасырлар элек язылган булсалар да, бүгенге көнгә кадәр актуальлеген югалтмыйлар. Туган тел көне белән һәм Теләче үзәк, балалар китапханәсе оештырган районкүләм «Без –Тукай оныклары» акциясендә җиңүчеләрне Теләче муниципаль район башлыгы Фатхуллин Айрат Гыйлван улы котлады һәм җиңүчеләргә дипломнар тапшырды. Шулай ук, фойеда Г. Тукай иҗатын яктырткан китап күргәзмәсе, рәсемнәр һәм кул эшләнмәләре урын алды. Бәйрәмне балалар бакчасында тәрбияләнүче нәниләр чыгышы, Теләче сәнгать мәктәбе укучылары Айсылу Сабирова һәм Чулпан Сафинаның матур җырлары, «Чулпан» бию коллективы – «Яз» төркеменең дәртле биюләре тагын да ямьләндереп җибәрде. Бәйрәм гадәткә кергәнчә аягүрә басып «Туган тел» җырын башкару белән төгәлләнде.