«Һөнәр сайлау – җаваплы эш»
29 апрель көнне Теләче җирлекара китапханәсе хезмәткәрләре Теләче урта мәктәбенең 8 нче сыйныф укучылары өчен бик тә мөһим һәм җаваплы темага – һөнәр сайлауга багышланган «Һөнәр сайлау – җаваплы эш» дип исемләнгән мәгълүмат сәгате үткәрделәр. Әлеге чара яшүсмерләргә һөнәрләр дөньясына күзаллауларын киңәйтергә һәм тормыш юлларын сайлауда ярдәм итәргә юнәлдерелгән иде. Әңгәмә барышында һөнәр сайлауның һәр кеше тормышындагы әһәмиятле адым булуы ассызыкланды. Максатка ирешү өчен белем алуның, белгечлек үзләштерүнең һәм һөнәр сайлауның кирәклеге билгеләп үтелде. Шулай ук, һөнәрнең хезмәт эшчәнлеге белән шөгыльләнүнең төп төре булуы, һәр һөнәрнең җәмгыять өчен мөһимлеге искәртелде. Һөнәре булган кешенең үз урыны һәм үз юлы булуы аңлатылды. Мәгълүмат сәгате дәвамында илебездә, төбәктә һәм районда хәзерге вакытта зур ихтыяҗ булган һөнәрләр турында фикер алышынды. Яшьләргә һөнәрнең кеше үз тормышын багышлый торган хезмәт булуын һәм шуңа күрә дөрес юл сайлауның мөһимлеге әйтеп үтелде. Ахырдан укучылар тест биремнәрен чиштеләр. Бу киләчәк һөнәри тормышка әзерләнергә ярдәм итеп кенә калмый, үз көчләренә ышанырга, максатларына ирешергә этәргеч бирә.