«Библиотөн 2025»
26 апрель көнне Казаклар авылы китапханәсе Россиядә 14 нче тапкыр үткәрелә торган «Библиотөн 2025» китап һәм укуга ярдәм итү буенча ел саен үткәрелә торган Бөтенроссия акциясенә кушылды. Быелгы акциянең гомуми темасы - «Үз геройларыбыз», ул Ватанны саклаучылар елы һәм Бөек Ватан сугышында Җиңүнең 80 еллыгы белән бәйләнгән. Безнең Ватаныбыз, Россия — геройлар иле. Китапханәче яшүсмерләрне «Курку белмәс лачыннар» дип исемләнгән күргәзмә белән таныштырды. Анда төрле еллардагы сугышларда катнашкан батыр якташларыбызга багышлап ясалган альбомнар, китапханә фондыннан халкыбызның бөек батырлыгы турындагы әдәбият тәкъдим ителде. Әлеге китаплар кырыс сугыш чоры вакыйгаларын ачып бирә һәм Ватаныбызның азатлыгын, бәйсезлеген яклап, сугышларда батырларча җиңгән кешеләр турында сөйли. Күргәзмә белән танышканнан соң балалар сугыш, батырлык турында шигырьләр укыдылар.