26 апрельдә бөек татар шагыйре Габдулла Тукайның туган көне билгеләп үтелә.
Аның китаплары балаларны туган як матурлыгын күрә белергә, игелеккә өйрәтә, мәрхәмәтле, гадел һәм кыю булырга чакыра. Бөек шагыйрьнең 139 еллыгы уңаеннан, китапханәнең яшь укучылары өчен «Тукай - сүнмәс йолдыз» дип исемләнгән әдәби сәгать үткәрелде. Чарада балаларга шагыйрьнең авыр балачагы, аның тормышы һәм иҗаты турында сөйләнелде. Балалар аның биографиясеннән күп яңалыклар белделәр. Туган ил, туган тел, табигать темасына кагылышлы шигырьләр укыдылар, әкият – поэмалар белән таныштылар. «Иллюстрация буенча Тукай әсәрен уйлап тап» дигән кечкенә генә викторина балаларга бигрәк тә ошады, алар сорауларга бик теләп җавап бирделәр. Чара барышында балалар бөек шагыйребезнең шигырьләрен яттан сөйләделәр. Ә ахырда бергәләп татар халкының гимнына әйләнгән «Туган тел» җырын җырладылар.