Габдулла Тукай – татар әдәбиятының күренекле шагыйре, аның иҗаты милли поэзиягә нигез сала һәм аның классик стилен билгели.
Кыска гомерле булуына карамастан, ул бай әдәби мирас калдырган язучы, аның иҗатының яртысы диярлек балаларга багышлана. Бөек шагыйрьнең туган көне уңаеннан Сауш авылы китапханәсендә «Тукай яши безнең йөрәкләрдә» дип исемләнгән шигъри кичә үткәрелде. Чара барышында китапханәче Габдулла Тукайның тормыш юлы һәм иҗаты турында тулырак мәгълүмат биреп, иҗатына күзәтү ясап башлап җибәрде. Аннары кичәдә катнашучы китап укучылар шагыйрьнең әсәрләрен яттан укыдылар. Тукайның иҗаты Ватанга, туган якка һәм халыкка ихлас мәхәббәт белән сугарылган. Аның шигырьләре матур һәм моңлы гына түгел, ә тирән гыйбрәтле дә – алар үзләрендә зирәклек, игелек, матурлыкның кадерен белергә өйрәтәләр, хезмәт сөючәнлек, шәфкатьлелек, гаделлек һәм батырлык тәрбиялиләр. Шагыйрьнең әсәрләре укучыларның күңеленә иман, өмет һәм хыял сеңдерә, шатлык һәм илһам бирә. Чара ахырында катнашучылар шагыйрь иҗатына багышланган китап күргәзмәсе белән таныштылар. Кичә бергәләп Г. Тукайның «И туган тел» җырын башкарып тәмамланды.