Быел бөтен ил Бөек Ватан сугышында Җиңүнең 80 еллыгын бәйрәм итәчәк.
Бу дата безнең һәрберебез өчен зур әһәмияткә ия. Бөек Ватан сугышы үзе белән авырту һәм югалту, рәхимсезлек һәм җимерү, күп кешеләрнең газапларын алып килгән чор ул. Без сугышчыларыбызны, сакчыларыбызны рәхмәт белән һәрдаим искә алабыз. 26 апрель көнне Сауш авылы китапханәсе «Библиотөн – 2025» Бөтенроссия акциясенә кушылды. Быел ул «Үз геройларыбыз» дигән тема астында узды. Акция кысаларында китапханәдә Бөек Ватан сугышында катнашкан якташларга багышланган «Алар даны мәңгелек» дип исемләнгән батырлык сәгате үткәрелде. Чара барышында катнашучылар Бөек Ватан сугышының мөһим этаплары белән таныша алдылар, беренче көннәрдән алып Берлинны алганчыга кадәр көрәшкән якташлары турында бик күп мәгълүмәтләр белделәр. Акция ахырында катнашучылар Ватан өчен гомерләрен биргән геройларны бер минут тынлык белән искә алдылар.