23 апрельдә Бөтендөнья китап һәм авторлык хокуклары көне билгеләп үтелә.
Бу вакыйга уңаеннан Айдар авылы китапханәсендә «Китап укып дөнья таныйбыз» дигән китапханә дәресе үткәрелде. Чараның максаты - катнашучыларны китап, язу тарихы, беренче язма материаллар, кулъязма һәм басма китаплар турындагы мәгълүматлар белән таныштыру, китапларга сакчыл караш формалаштыру. Тормышта һәр кешене китап белән ни дә булса бәйли. Китап безне, беренче хәрефләрдән башлап, бөтен җирдә озатып йөри. Күпме генә еллар үтмәсен, кулларда яхшы китаптан әйбәт әйбер юк. Китаплар, үзләренең озын үсеш юлын балчык тактачыклардан алып заманча электрон китапларга кадәр узып, бүгенге көндә дә белемнәрне саклау һәм тарату өчен иң ышанычлы ысулларның берсе булып кала. Чара барышында укучылар китап тарихы белән таныштылар, китап турында кызыклы фактлар, «китапханә» төшенчәсенең нәрсә аңлатуы, нинди китапханәләр барлыгы турында белделәр. Шулай ук, китапның әһәмияте, китапларга куелган һәйкәлләр турында сөйләшенде, апрель аенда туган язучы - шагыйрьләр искә алынды. Очрашу ахырында китапханәче: «Китаплар укыгыз! Нәрсә генә эшләсәгез дә, нәрсә белән шөгыльләнсәгез дә, сезгә һәрвакыт акыллы һәм тугры ярдәмче — китаплар кирәк булачак», - дигән өндәмә белән мөрәҗәгать итте.