28 апрель көнне Теләче балалар китапханәсендә башлангыч сыйныф укучылары белән «Без террорсыз дөнья өчен» дигән тематик очрашу үтте.
Китапханәче балаларга «террорчылык» төшенчәсен аңлатты, аның бөтен кешелеккә нинди куркыныч янавы турында сөйләде, шулай ук, соңгы дистә еллардагы эре терактлар турында искә төшерделәр, шуларның берсе Бесланда булганын искәртеп үттеләр.
Террор вакытында үз-үзеңне тоту кагыйдәләренә, шикле әйберләргә якын бармаска кирәклегенә аерым игътибар бирелде, Балалар белән теракт корбаны булмас өчен гражданлык уяулыгы күрсәтүнең никадәр мөһим булуы турында фикер алышынды. Шулай ук террорчылык акты янаган очракта үзеңне һәм якыннарыңны ничек сакларга тиешлеге турында сөйләнде.
Очрашу ахырында китапханәче китап укучыларга террорчылыкка каршы белешмәләр таратты, аларда теракт куркынычы янаганда, шартлаткыч җайланманы тапканда нишләргә кирәклеге турында мәгълүмат бирелде.