8 июль – Бөтенроссия гаилә, мәхәббәт һәм тугрылык көне буларак билгеләп үтелә.
8 июль – Бөтенроссия гаилә, мәхәббәт һәм тугрылык көне буларак билгеләп үтелә.
Билгеле булганча, гаиләдәге мөнәсәбәтләрдән кешенең җәмгыятьтәге тормышы башлана, шуңа күрә гаиләдә җылылык һәм яктылык хөкем сөрү мөһим. Гаилә төрле буыннарны бәйләүче звено ролен үти, ул дини, милли һәм мәдәни традицияләрне саклый. Ныклы, сәламәт гаилә – көчле илнең нигезе. Шуңа күрә гаилә әгъзаларына карата уңай караш,ярату хисен тәрбияләү кечкенәдән үк -мәктәпкәчә яшьтән башланырга тиеш.
Бөтенроссия гаилә, мәхәббәт һәм тугрылык көнен әле берничә ел элек кенә бәйрәм итә башладылар.Бәйрәмнең символы булып ромашка чәчәге тора. Нәкъ менә әлеге ак таҗлы чәчәкләр гаиләдә бер-береңә булган мәхәббәтне, аклыкны, пакълыкны сурәтли.
Теләче 2нче номерлы балалар бакчасында да бу бәйрәм уңаеннан төрле чаралар уздырылды.Тәрбиячеләр балаларга тагын бер кат гаиләнең һәрбер кеше тормышында зур урын алып торуын һәм гаилә әгъзаларына карата уңай карашта булырга кирәклеген әңгәмәләрдә аңлатып үттеләр; кызыклы шигырьләр ,әкиятләр укыдылар һәм мәкальләрне искә төшерделәр.
Бәйрәм алдыннан гына зур төркемнәргә йөрүче балалар “Минем гаиләм” темасына рәсемнәр һәм “Ромашка-мәхәббәт билгесе” темасы астында кул эшләре ясадылар.Соңыннан бу эшләрдән тәрбиячеләр һәрбер төркем бүлмәсенең фоесында күргәзмәләр оештырдылар.