ЯҢАЛЫКЛАР
Баландыш төп мәктәбендә Ватанны саклаучылар көненә багышланган хәрби-патриотик тәрбия айлыгы дәвам итә. Безнең мәктәпнең тәрбия эшчәнлегендә төп максатларның берсе-укучыларда гражданлык-патриотик сыйфатлар тәрбияләү. Әлеге максатны тормышка ашыру өчен даими рәвештә гражданлык һәм хәрби-патриотик юнәлеш алып баручы чаралар оештырыла. Айлык кысаларында мәктәптә "Батырлык дәресләре"үтте.
Балык Бистәсе районында "ГТО"ФСК кышкы фестиваленең зона этабы узды. Биредә безнең Теләче урта мәктәбе командасы да чыгыш ясады. Тренерлар, физик тәрбия укытучылары Хакимов Рафил Рефат улы, Салихова Зөлфия Хәмзә кызы җитәкчелегендә үткән ярыш нәтиҗәләре түбәндәгечә булды:
Ярышта “Батырлык" һәм “Дуслык”командалары катнашты. Командалар төрле кызыклы конкурсларда катнаштылар: тизлектә, җитезлектә сынаштылар, үрмәләү, бәрәнге әрчү, төймә тагу кебек конкурсларда катнаштылар.
Бәйгедә "Дуслык" командасы җиңү яулады.
Заман үзгәрә барган саен, тормыш яңа һөнәрләр таләп итә. Гомерлек юлны сайлау бик авыр. Һөнәр – ул кеше хезмәте һәм эшчәнлегенең төп төре. Кайсын гына алсак та , аларның һәрберсе җәмгыятебез өчен бик кирәкле. Шул уңайдан Олы Мәтәскә авылы мәдәният хезмәткәрләре 25 февраль көнне берләшмәгә йөрүче укучылар белән түгәрәк өстәл артында әңгәмә үткәрделәр. Бу әңгәмә “Һөнәрнең һәр кайсы мактауга лаек”дип исемләнгән иде. Укучыларга мәктәпне тәмамлагач нинди һөнәрләр сайлыйсыз? -дигән сораулар бирелде. Аларның һәркайсы нинди һөнәр сайлауларын әйтеп үттеләр. Укучыларның шушы хыяллары тормышка ашсын дигән теләктә калабыз.
21 февраль – Халыкара туган тел көне уңаеннан Теләче үзәк китапханәсе 10 февральдән 20 февральгә кадәр “Укыйм туган телдә” дип исемләнгән флешмоб узды. Шигырьне һәркем үз туган телендә башкаруы, эчтәлеге буенча — халкыбызның, милләтебезнең мәдәниятен, сәнгатен, тарихын чагылдыруы зарур булды.
Флешмоб кысаларында катнашып 52 кеше туган телгә багышланган шигырь укып, 20 февральгә кадәр #укыймтугантелдә2022, #теләчеүзәк китапханәсе хэштеглары белән үзләренең социаль челтәр битендә урнаштырып барды. Катнашучыларга рәхмәтебезне белдереп электрон сертификатлар җибәрелде, алга таба да иҗади уңышлар теләп калабыз!
Теләче 2нче балалар бакчасында, мәктәпкәчә яшьтәге балаларга һөнәри юнәлеш бирү эшен системалаштыру, балаларның һөнәрләр дөньясы турында күзаллауларын киңәйтү максатыннан, «Әти-әнием һөнәре» проекты тормышка ашырыла. Бу атнада әлеге проект кысаларында мәктәпкә әзерлек төркеме балалары төркемдәшләренең әтиләре Бәдриев З., Гайнуллин И., Фәтхуллин А. һәм Авхаров И. белән очраштылар. Алар балаларга үз һөнәрләре турында сөйләделәр һәм кызыклы презентацияләр күрсәттеләр.
Олы Нырсы мәдәният йортында китапханә белән берлектә Ваттаны саклаучылар көне уңаеннан “Ягез әле, егетләр!” исемле КВН-ярыш үткәрелде. Егетләр төрле сынауларны үтәп, көч сынаштылар. Ярышлар күңелле уеннар, җырлар белән үрелеп барды. Кичә бик күңелле узды. Авылдашлар һәр катнашучыга кул чабып, дәрт өстәп тордылар. Бәйрәм азагында һәр катнашучыга истәлекле бүләкләр тапшырылды.
24 февраль көнне ӨБМБҮ “БИҮ” да педагог-оештыручылар семинары булып узды. Бу семинар-кинәшмәдә узган бәйгеләргә анализ һәм балалар оешмаларының алга эш планы каралды. Шулай ук узган эшләр дә билгеләнеп үтелде.
Китапханәче Альбина Рәхмәтуллина китап күргәзмәсенә күзәтү ясады, татар халык авыз иҗаты турында сөйләде, шулай ук милли гореф-гадәтләребезгә тукталды. Кичәдә катнашучылар ике командага бүленеп, интеллектуаль сорауларга җаваплар таптылар. “Әйтеп бетер” дигән исем астында мәкальләр, санамышлар әйттеләр, табышмакларга җаваплар эзләделәр. Туган телгә багышланган шигырьләр, әсәрләрдән өзекләрне яттан сөйләделәр. Чара татар халкының күңелле уеннары, биюләре белән бергә үрелеп барды.
Туган тел көне уңаеннан Олы Нырсы балалар бакчасында халкыбызның гореф – гадәтләре, йолалары турында әңгәмәләр үткәрелде. Балалар туган тел турында шигырьләр сөйләделәр, халкыбызның уеннарын бик яратып уйнадылар. Иң соңыннан “Туган тел” җырын башкардылар.