ЯҢАЛЫКЛАР
Туган як табигатенә сакчыл караш, экологик культура тәрбияләү максатыннан 17 нче сентябрь көнне Баландыш авыл китапханәсендә мәктәпкәчә яшьтәге балалар белән “Урман - безнең байлыгыбыз” дигән экологик сәгать үткәрелде.Табышмакларга, кызыклы сорауларга җавап табып, күңелле уеннар уйнап балалар табигать дуслары булдылар.
Әкиятләр иле - дөньядагы иң гаҗәп һәм иң матуры. Монда гына болытлар астында тиз генә очып йөрүче келәм-самолетны күрергә яки урманда кеше тавышы белән сөйләшүче соры бүре белән очрашырга, яки очраклы рәвештә Убырлы карчыкның иске өенә тап булырга мөмкин.
Моның шулай булуын районыбыз территориясендә күпме мәйданны биләп торучы урманнар дәлилли. Урман хуҗалыгы хезмәткәрләре көненә карата 16 сентябрь көнне Урта Мишә авылы китапханәсендә "Урман дөньясына китап аша" дип исемләнгән экологик сәгать үткәрелде. Чарага экология белән кызыксынучы укучылар өчен күргәзмә эшләнде. Биредә урманның кеше сәламәтлегенә йогынтысы, табигатьне саклау турындагы һәм туган җиребезгә, әйләнә-тирә мохиткә, урманнарга карата булган хисләрен үзләренең иҗат җимешләрендә күрсәткән язучыларның әсәрләре белән танышып була.
Абдулла Алиш - татар совет шагыйре, язучы. Ул күпсанлы шигырьләр, очерклар, хикәяләр, пьесалар гына түгел, әкиятләр дә язган. Аның әсәрләре балаларда иң яхшы сыйфатларны тәрбияләргә ярдәм итә. Танылган татар язучысының тууына 115 ел тулу уңаеннан, Күкчә авыл китапханәсендә «Галиҗәнап китап - тылсымлы көч» дип исемләнгән китапларга күзәтү үткәрелде. Чара башында китапханәче язучының биографиясе, тормышы һәм иҗаты турында сөйләде. Шулай ук Абдулла Алиш әкиятләрен кычкырып укулар да үтте. Чара "Тылсымлы сүзләр" берләшмәсенә йөрүче балалар белән "Сертотмас үрдәк" әкиятен уку белән төгәлләнде.
Олы Нырсы авылы китапханәчесе балаларны «Тылсымлы китапханә дөньясы» урамнары буйлап сәяхәткә чакырды. Сәяхәт барышында урамнар урынына - китап стеллажлары, катлар урынына- китап киштәләре, йортлар урынына — китап томнары белән таныштылар. Шулай ук китапханәгә бару кагыйдәләре, китапларны киштәләргә урнаштыру тәртибе турында белделәр, төрле кызыклы китап-сюрпризларга сокландылар.
Танылган татар язучысы Абдулла Алишның тууына 115 ел тулу уңаеннан, 16 сентябрь көнне Үзәк авылы балалар бакчасында «Абдулла Алиш әкиятләре» исемле әдәби сәгать үткәрелде. Абдулла Алиш шигырьләр, очерклар, хикәяләр, пьесалар гына түгел, әкиятләр дә язган. Аның әсәрләре балаларда иң яхшы сыйфатларны тәрбияләргә ярдәм итә. Чара башында, презентация ярдәмендә Үзәк авылы китапханә хезмәткәрләре язучының биографиясе, тормышы һәм иҗаты турында сөйләделәр. Аннары балалар сорауларга җавап бирделәр. Чара Абдулла Алишның танылган әкиятләре буенча мультипликацион фильмнар күрсәтү белән тәмамланды.
Игелекле һәм тәрбияле бала тәрбияләү өчен балачактан әхлак нигезләренә, яхшылык белән яманлыкны аера белергә, кешелек дөньясындагы барлык яхшы сыйфатларны булдырырга өйрәтергә кирәк. Шул максаттан чыгып, Алан авыл китапханәсендә әдәплелек һәм әхлак дәресе үтте.
Башка халыклар иҗатындагы кебек, татар халык авыз иҗатында да төрле жанрлар арасында күләме белән дә, әдәби һәм тарихи-эстетик кыйммәте ягыннан да әкиятләр әһәмиятле урыннарның берсен алып тора. Әкиятләрдә халыкның күп гасырлык тормыш тәҗрибәсеннән туган зирәклеге, тапкырлыгы, яхшылык һәм явызлык турындагы төшенчәләре тупланган, киләчәккә өмет һәм хыяллары чагылган. Әкият явызлыкны гаепли, гаделлекне, хаклыкны яклый, кешеләрне игелекле, тугры һәм мәрхәмәтле булырга өйрәтә.Әкиятне тыңларга һәм укырга яратучылар - балалар. Шуны истә тотып 15 сентябрь көнне Олы Мәтәскә авылы мәдәният хезмәткәрләре “Каенкай” балалар бакчасында “ Әкияттә кунакта”дип исемләнгән әкиятләр укуны оештырдылар.
Татар балалар язучысы Абдулла Алишның тууына 115 ел тулу уңаеннан Шәтке авылы китапханәчесе "Әллүки" балалар бакчасы балалары өчен "Абдулла Алиш әкиятләре эзеннән" дигән әдәби сәгать уздырды. Китапханәче балаларны язучының тормышы һәм иҗаты белән таныштырды. Әкиятләрен укып геройларга анализ ясады. Абдулла Алиш искиткеч әкиятче , «Сертотмас үрдәк», «Бикбатыр белән биккуркак», «Куян кызы» һәм башка әкиятләр авторы. Китапханәдә китап-күргәзмә ясап куелды.
Танылган балалар язучысы Абдулла Алишның тууына 115 ел тулу уңаеннан Югары Кибәхуҗа авылы китапханәсендә китап укучылар өчен «Абдулла Алиш- әкиятче дә, батыр да» дигән китапханә дәресе узды.