«Җылылык көтә җирдә һәр йөрәк».
1-10 декабрь көннәрендә Россиядә традиция буенча инвалидлар декадасы — мөмкинлекләре чикләнгән кешеләрнең проблемаларын хәл итү һәм җәмгыятьне аларга ярдәм итүгә җәлеп итү максатыннан игелекле эшләр марафоны уза. Безнең арада тормышның һәр адымын зур кыенлык белән үтүче, әмма сынмыйча, хәтта иң кечкенә җиңүләргә дә сөенеп яшәүче гаҗәеп кешеләр бар. 4 декабрь көнне Айдар авылы китапханәсе мәдәният йорты, авыл җирлеге һәм ветераннар Советы белән берлектә тумыштан инвалид булган авылдашларын «Җылылык көтә җирдә һәр йөрәк» дип исемләнгән җылы һәм күңелле кичәгә чакырды. Бу изге чарада көн саен тормыш сынауларына каршы торучы иң көчле һәм батыр кешеләргә багышланган күпсанлы җылы сүзләр яңгырады. Кунаклар, авыруларын онытып, шатланып уйнадылар, биеделәр һәм күңел ачтылар. Китапханәче аларны балалар китаплары һәм журналлары белән таныштырды, шулай ук сәламәтлек мөмкинлекләре чикләнгән язучыларның «Күңеле белән көчлеләр» исемле әсәрләр күргәзмәсен тәкъдим итте. Күргәзмәдә талантлы авторлар һәм шагыйрьләрнең иҗат җимешләре урын алды, алар физик чикләүләргә карамастан, төрле буын укучыларының күңеленә үтеп кергән искиткеч әсәрләр иҗат иттеләр. Кичә җылы һәм дусларча аралашу белән чәй табыны артында дәвам итте, кунаклар күңелле мизгелләр кичереп, татлы сыйлар белән сөенделәр. Бу көн чын күңелдән чыккан яктылык, җылылык һәм бер-береңә ярдәм итү хисләре белән тулы бәйрәмгә әверелде.