ЯҢАЛЫКЛАР

Иске Җөри авылы китапханәсендә “И туган як, гүзәл як” дип исемләнгән рәсем конкурсы узды. Балалар туган як табигатен  ясадылар.

Нәниләребез Россия һәм Татарстанның символикалары турында шигырьләр укыдылар, горурланып, гимннарын тыңладылар, татар һәм рус халкы уеннарын уйнадылар, төрле халык биюләрен биеделәр.Әти-әниләребез дә бу бәйрәмнән читтә калмады, алар балалар белән бергә өйдә төрле эшләнмәләр әзерләделәр. Аларның иҗат җимешләреннән торган күргәзмә оештырылды.

Шул унайдан, Шәтке авыл китапханәсендә «30 октябрь сәяси репрессия корбаннарын искә алу көне» дип аталган китап күргәзмәсе эшли башлады. Россия тарихында фаҗигале чорлар аз түгел. Тоталитар режим шартларында нахакка гаепләнеп, төрле кимсетелүләргә дучар ителеп, йорт-җирләрен, туган төбәкләрен калдырып, сөргеннәргә сөрелеп, шунда исәнлекләрен югалткан, әҗәлен тапкан кешеләр күп булган. Китапханә фондларыннан алынган китаплар шул давыллы еллар турында сөйли.  

Кадерле дуслар! 3 - 8 нче ноябрь  көннәрендә   Бөтендөнья  акциясе “ Зур этнографик  диктант” дип исемләнгән акция  үткәрелә.  Быел акция Россиянең барлык 85 төбәгендә һәм  чит илләрдә онлайн - форматта  үткәрелә . 3 нче ноябрь көнне Теләче урта мәктәбендә  Бөтендөнья  акциясе “ Зур этнографик  диктант”ны 9 а  сыйныфы укучылары  флешмоб биеп башлап  җибәрделәр. Акция дәвам  итә. Барлык теләүчеләр 8 нче ноябрьгә кадәр  www.miretno.ru   сайтында  Диктантта катнаша аласыз. Бөтендөнья  акциясе “ Зур этнографик  диктантта” катнашу Сездә  Туган илебез халыкларын, төрле милләттән булган туганнарыгызның , дусларыгызның   яшәү традицияләрен  якыннан белү теләген уятыр дип уйлыйбыз. Илебезнең төп байлыгы, җиңелмәс көчле булуы - халыклар дуслыгында. Бөтендөнья  акциясе “ Зур этнографик  диктантта” барлык теләгәннәр катнаша ала. Бергә булыйк! Бердәм булыйк! “ Зур этнографик  диктант”  акциясендә катнашыгыз!

31 октябрь көнне Олы Мишә авыл китапханәсендә укучы балаларның каникул вакытында вакытларын файдалы итеп үткәрү, наркоманияне кисәтү, сәламәт яшәү рәвешен пропагандалау максатыннан китап күргәзмәсе ясалды. Күргәзмәгә профилактик эчтәлекле, наркоманиягә кагылышлы, аның зарары һәм сәламәт яшәү рәвешен сүрәтләгән матур әдәбият сайлап урнаштырылды. Мәсәлән: Фәүзия Бәйрәмованың “Алыплар илендә” повесте, Мәдәни Маликованың “Чәчкә балы” повестендә наркомания яшьләр мисалында ачыла. Бу теманы яктырткан мәкаләләрне, ата-аналарга киңәш өчен ясалган буклетлар куелды.

31 октябрь көнне Казаклар авылы китапханәсендә "Хыялый балачак" берләшмәсенә йөрүче балалар белән берлектә «Компьютерда - яңалыклар, китапта – тормыш» дип исемләнгән библио-флешбук үткәрелде. Чара барышында китапханәче цитаталар һәм иллюстрацияләр ярдәмендә балаларны күргәзмәдәге кызыклы китаплар белән таныштырды. Балалар күңелләренә ошаган китапларны алып укыдылар. Башка балаларны кызыктырырлык итеп үзләренең уй-кичерешләре ярдәмендә бу китапка реклама ясадылар. Библио-флешбук кызыклы хәм мавыктыргыч килеп чыкты.

Бу көн - Россия тарихында иң фаҗигале даталарның берсе. Бу көнне без нигезсез рәвештә репрессиягә дучар ителгән, төзәтү-хезмәт лагерьларына җибәрелгән, сөргенгә сөрелгән, тормыштан мәхрүм ителгән кешеләрне искә алабыз. Шушы дата уңаеннан Алан авылы китапханәсендә китап укучылар игътибарына  “Гел хәтердә, гел истә” дип исемләнгән күргәзмә һәм “Татар әдипләре, якташларыбыз - сәяси репрессия корбаннары” исемле альбом тәкъдим ителде.

Үзәк авыл мәдәният йортында мәдәният хезмәткәрләре "Исемнәрне онытмаска..."дигән исем астында Татарстанның репрессияләнгән язучылары һәм шагыйрьләре истәлегенә багышланган хәтер сәгате үткәрделәр.  Россия тарихындагы фаҗигале сәхифәләр турында искә төшерү. меңләгән кешенең хаксыз рәвештә репрессиягә дучар ителүе, җинаятьләрдә гаепләнүе, хезмәт лагерьларына җибәрелүе, гомерләреннән мәхрүм ителүе турында балаларга сөйләделәр. Ул елларда Г.Ибраһимов, Ф. Кәрим, Х. Туфан, И. Сәлахов, Ш. Усманов, С. Баттал һ. б.  “халык дошманы”  дип игълан ителә. Катнашучылар  игътибарына репрессиягә эләккән язучылар турында слайд-презентация, китаплар  тәкъдим ителде.

Комсомол оешмасы яшь Советлар иленә сәяси һәм икътисади яктан аеруча куркыныч туган чорда гамәлгә кертелеп, һәм төзелүнең беренче көннәреннән комсомоллар илебез куәтен арттыруда,яңа шәһәрләр,завод-фабрикалар төзүдә катнашалар.
29 октябрь көнне Балыклы авылы мәдәният хезмәткәрләре шушы дата уңаеннан "Комсомол-тормыш мәктәбем" дигән исем астында ветеран комсомоллар белән очрашып,алар үз чиратында башкарган эшләре, комсомолда чыныгу алып олы тормышка аяк басулары турында сөйләделәр.

Илебез елъязмасына күңелләрне өшетерлек вакыйгалар да уелып калган. Шуларның берсе - репрессия еллары. 1920 елдан башлап 50 нче елларга кадәр элеккеге Советлар Союзының 10 миллионнан артык кешесенә "кара тамга" тагылып, гөнаһсызга рәнҗетелә. Меңнәрчә кеше гаепсезгә атыла, күпмесе төрмәләрдә утыра, сөргеннәргә озатыла, үзәкләргә үтәрлек кимсетелү, җәберләүләргә дучар ителә, сабыйлар әти-әниләреннән тартып алынып балалар йортларына таратыла. Гаделсезлек корбаннарының үзләренә генә түгел, туганнарына, балаларына да "халык дошманы" булып яшәргә, газаплар, түбәнсетелүләр эчендә янарга туры килә.
Әлеге дата уңаеннан Күкчә авыл клубында китап күргәзмәсе ясалып куелды.