ЯҢАЛЫКЛАР

9 октябрь көнне Ачы авыл китапханәсендә балалар өчен "Җәнлекләргә, кошларга, балыкларга, үз йортларын табарга ярдәм ит" дигән экологик уен-сәяхәт үткәрелде. Китапханәче Тихонова Вера Михайловна балаларга хайваннарга карата сакчыл караш кирәклеген һәм әйләнә – тирә мохитне саклауның әһәмияте турында сөйләде. Балалар «Ребятам о зверятах» дигән уен сорауларына тиз һәм дөрес җавап бирделәр, карточкалардагы биремнәрне үтәделәр. Китапханәче биргән сораулар буенча балалар үзләренең өйләрендә яшәүче хайваннар турында җентекләп сөйләделәр. Уен барышында балалар үзләренең зирәклекләрен күрсәттеләр, ә иң мөһиме – табигатьтән, кошлардан, җәнлекләрдән башка дөнья тулы булмавын аңладылар. Кеше табигать турында кайгыртырга тиеш. Табигатьне ярату-үз Ватаныңны ярату дигән сүз.

9 октябрь көнне Әтнә районы Ашыт спорткомплексында 2007-2008 нче елгы егетләр һәм кызлар арасында волейбол буенче ачык Әтнә муниципаль районы беренчелеге узды. Теләче спорт мәктәбе командасы да әлеге ярышларда актив катнашып кайтты. Кызлар командасы Теләче, Шәтке урта мәктәбе укучылары, ә егетләр командасын Шәтке, Иске Җөри, Үзәк урта мәктәбе укучылары тәшкил итте.

10 октябрьдә Теләче авылында «Татарстан-Яңа гасыр»республика иҗтимагый хәрәкәте призларына Татарстан Республикасы муниципаль районнарының 1 лигасы һәм II лигасы ирләр һәм хатын-кызлар командалары арасында волейбол буенча ярышлар узды. Барлыгы 16 команда катнашты.

Казаклар авылы китапханәсе укучылар белән берлектә «Көзге мәрхәмәтлек атнасы» акциясенә кушылды. Бөек Ватан сугышында хәлак булганнар истәлегенә куелган һәйкәл тирәсе чистартылды. Шулай ук балалар мәйданчыгы чүп-чардан арындырылды. Балалар бу изге эштә катнашулары белән бик канәгать калдылар.

16 сентябрь көнне Казаклар авылы китапханәсендә Теләче районының кабат торгызылуына 30 ел тулу уңаеннан “Киләчәккә шанлы үткәненнән, горур атлый минем авылым” дип исемләнгән кичә үткәрелде. Кичәдә Раъно Шаипова җитәкчелегендә Кече Кибәхуҗа төп мәктәбе укучылары катнашты. Укучылар “Тарих! Дөньяда иң бөек нәрсә син! Син тузмыйсың, байыйсың гына!” дип исемләнгән презентация ярдәмендә авылыбызның тарихы белән таныштылар. Чара барышында “Теләче районының үткәне, бүгенгесе, киләчәге” дигән китап күргәзмәсенә һәм күренекле якташларыбызга багышланган“Шушы яктан, шушы туфрактан без” дип исемләнгән күргәзмәгә күзәтү ясалды. Бу чарада укучылар якташ язучыларның китаплары белән таныштылар, шулай ук аларның шигырь һәм әсәрләрен кычкырып укыдылар

Халыкара тынычлык көненә багышланган «Дети мира, за руки возьмитесь!» дигән конкурс игълан ителгән иде. Һәр катнашучы бала үзенең темасы буенча  иҗади эш сайлап алды һәм анда әйләнә-тирәне  чагылдырырга тырышты. Әлеге чара балаларда һәм яшүсмерләрдә үз иленә, милләтенә, мәдәниятенә, мәхәббәт һәм патриотик хис тәрбияләүгә юнәтелгән. Иң яхшы сәнгать әсәрләре һәм иҗат эшләре китапханәдәгә күргәзмәне бизи.

16 сентябрь көнне Теләченең 3 нче номерлы «Шатлык» балалар бакчасында тәрбияләнүчеләр район балалар китапханәсенә мавыктыргыч экскурсиягә килделәр. Китапханә хезмәткәрләре балаларны бик җылы каршы алдылар һәм китаплар дөньясына сәяхәт кылырга тәкъдим иттеләр.

Балалар зур кызыксыну белән китапханә һәм аның тәртипләре белән таныштылар. Китапханәче аларны китап һәм журналлар белән таныштырды, абонементта һәм уку залында үз-үзеңне тоту кагыйдәләре турында сөйләде.

Моннан тыш, балалар белән әкият геройлары турында кызыклы уен үткәрелде. «Әкият героен уйлап тап» уены нәниләргә бик ошады.

Нәтиҗәдә, балалар китаплар белән сакчыл эш итәргә һәм китапханәгә бик еш килергә сүз бирделәр.

Экология проблемаларына игътибар җәлеп итү, табигый ресурслардан һәм әйләнә-тирә табигатьтән рациональ файдалану һәм саклауга, туган табигатькә мәхәббәт тәрбияләү, Ватаныбызның киләчәге өчен җаваплылык тәрбияләү максатыннан Шармыш авыл клубында Бөтенроссия урман көненә (15 сентябрь) һәм Халыкара Урман хезмәткәрләре көненә (19 сентябрь) багышланган «Безнең төбәк - безгә аны сакларга һәм сакларга» дигән экологик сәгать үткәрелде. Балалар стенд материалы белән таныштылар, «Шәһәрдә һәм табигатьтә экологик тәртип кагыйдәләре» дигән уен үткәрделәр, «Урман викторинасында» катнаштылар, "Табигатьне саклагыз!” дип исемләнгән  презентация карадылар.

Сәламәтлек үз кулыбызда. Сәламәтлекне саклыйк ,ныгытыйк һәм арттырыйк. Шул уңайдан Олы Мәтәскә авылы мәдәният хезмәткәрләре “Сәламәтлек- озын гомернең нигезе” дип исемләнгә әңгәмә үткәрделәр . Бу чара берләшмәгә йөрүче укучылар белән үткәрелде.Әңгәмә барышында нинди кешене сәламәт дип әйтеп була,сәламәт булу өчен нишләргә, яшүсмерләрнең сәламәтлеге нәрсәгә бәйле булуы турында әйтелде, сәламәтлек турында мәкальләр һәм әйтемнәр яңгырады.

Китап укуга битараф булмаучылар яңа китапны кулга алып, матур тышлыгын ачып битләрен кыштырдатып, иң беренче ачучы булулары белән бәхетле. 16 сентябрь көнне Айдар авыл китапханәсендә төрле яшьтәге китап укучылар өчен “Яңа китаплардан көзге букет” дип исемләнгән библиофреш үткәрелде. Китапханәче Фаляхова А.Г.  китапханә фондына кергән яңа әдәбият турында сөйләде һәм күргәзмәгә күзәтү үткәрде.

Хөрмәтле китап укучыларыбыз! Китапханәбезгә рәхим итегез, яңа китаплар сезне көтә!