ЯҢАЛЫКЛАР
Китапханәчеләр презентация ярдәмендә укучыларны XIX гасырның күренекле татар галиме-этнографы, әдәбиятчысы һәм мәгърифәтчесе Каюм Насыйри биографиясе һәм иҗаты белән таныштырдылар. Ярты гасырдан артык фәнни, әдәби һәм педагогик эшчәнлеге дәверендә нәфис әдәбият, фольклор, филология, педагогика, математика, тарих, география, астрономия һәм фәннең башка тармаклары буенча кырыкка якын хезмәт бастырып чыгаруын белделәр.
Табышмаклар чишү - Борынгы Русь чорыннан ук барлыкка килгән. Табышмакларны чишү һәркемне: балаларны да, өлкәннәрне дә мавыктыра. Китапханәчеләр чарада катнашучыларны табышмакларның барлыкка килү тарихы, табышмакларның нинди төрләре булуы белән таныштырдылар һәм алга таба рифмалы табышмакларга уен үткәрделәр.
Китапханәчеләр яңа китапларга күзәтү ясадылар. Китапханәчеләр килүенең максаты мәктәпкәчә яшьтән үк китап белән кызыксындыру, китапка сакчыл караш тәрбияләү. Балалар төрле формадагы китапларны, китапханә алдыра торган балалар журналларын бик яратып карадылар. Балалар белән бергә бик күп кенә сорауларга җаваплар эзләнде. Эш барышында китап белән эшләү кагыйдәләрен дә искә төшерделәр: рәсем ясамаска, язмаска, битләрен бөгәрләмәскә, ертмаска, рәсемнәрен кисмәскә, ашау вакытында китап укымаска, китап эченә карандаш яки ручка тыкмаска.
2025 елның 27 февралендә чаңгы базасында 1-6 класс укучылары арасында чаңгы ярышлары һәм 7-11 класс укучылары арасында Әфганстан Республикасыннан гаскәрләрне чыгаруның 36 еллыгына һәм Бөек Ватан сугышында Җиңүнең 80 еллыгына багышланган биатлон буенча Теләче муниципаль районы Беренчелеге үткәрелде. Ярышларда районның 11 мәктәбеннән 81 укучы катнашты.
2025 нче елда илебез Бөек Ватан сугышында Җиңүнең 80 еллыгын бәйрәм итә. Солдатларның һәм тылда җиңү яулаган халыкның батырлыгы беркайчан да онытылмас. Укучыларның Бөек Ватан сугышы тарихы белән кызыксынуын арттыру, ветераннарга карата ихтирамлы мөнәсәбәт формалаштыру, җәмгыятебезнең мәдәнияте, тарихы, традицияләре белән кызыксыну максатында районыбызның балалар иҗат үзәгендә «Буыннарның үлемсез хәтере» дигән конкурс үткәрелде. Безнең мәктәп укучылары “Сугыш чоры кораллары, техникасы” номинациясендә 3 нче урын яуладылар. Котлыйбыз!
2025 елның 25 февралендә Теләче 3 нче номерлы балалар бакчасына диспансеризация үткәрү өчен «Теләче үзәк район хастаханәсе» нән табиб-белгечләр килде. Балалар бакчасында диспансерлаштыру елына 1 мәртәбә һәм расланган график буенча үткәрелә. Диспансеризация үткәрүдә табиб-белгечләр катнаша, алар баланы карау нәтиҗәләре буенча медицина картасына язып куя һәм баланың сәламәтлек паспортына бәяләмә кертә. Быел балаларны профилактик тикшерүне түбәндәге составтагы табиблар бригадасы үткәрде: табиб – педиатр, офтальмолог, отоларинголог, лаборант.
Балалар өч командага бүленеп интернеттан дөрес файдалануга багышланган ШТМ да ярыштылар. Биредә яңгыраган сораулар һәм киңәшләр киберкуркынычсызлык, интернетта үз - үзеңне яклау ысуллары турында нәтиҗәле аралашуга ярдәм итте. Призлы урыннар алган командаларга һәм иң актив катнашучыларга грамоталар бирелде.
23 февраль - көчле рухлы, кыю ир-егетләргә Ватан алдындагы антына тугрылыгын, үзләренең ир-егетләрнең солтаны булуын тагын бер тапкыр искәртә торган бәйрәм. Шул уңайдан, Айдар авыл китапханәсе “Сыналганнар, бурыч үтәгәннәр, ир-егетләр булып калалар” дип исемләнгән тематик күргәзмә тәкъдим итеп һәм патриотик сәгать үткәреп авылдашларыбызның хәрби хезмәт истәлекләре белән уртаклашты. Чараның максаты – солдат хезмәтендә булган, туган илен саклауга үз өлешен керткән ир-егетләргә хөрмәт тәрбияләү, батырларны һәм армия хезмәтенең иң истәлекле һәм кабатланмас мизгелләренең кадерле экспонаты булган солдат альбомнарын барлау.
21 февраль көнне Күкчә авылы китапханәсендә, авыл клубы белән берлектә, Халыкара туган тел көненә багышланган «Туган телем» дип исемләнгән шигърият сәгате үткәрелде. Китапханәче сөйләвеннән балалар Халыкара туган тел көне барлыкка килү тарихы турында белделәр. Шулай ук планетада телләрнең күптөрлелеге, туган телнең халык хәтере, аның тарихы, рухи куәте булуы турында сөйләнде. Чарада балалар татар шагыйрьләренең туган тел турында шигырьләрен укыдылар, сорауларга җавап бирделәр, тел турында әйтелгән сүзләр, мәкальләр һәм әйтемнәр белән таныштылар, уеннарда һәм конкурсларда катнаштылар.
Шәдке авылы мәдәният хезмәткәрләре «Туган тел ул— халык җаны» дигән танып-белү сәгате үткәрделәр. Китапханәче һәм мәдәният йорты директоры балаларга туган телнең кеше һәм җәмгыять тормышында мөһим роле, туган телдә халыкның гореф-гадәтләре, көнкүреше, акылы, матурлыгы чагылуы, күпмилләтле илебездә яшәвебез һәм бөек рус теле барыбызны да берләштерүе турында сөйләделәр.