ЯҢАЛЫКЛАР

Шуны белергә кирәк: терроризмга каршы көрәшү генә түгел, ә аның барлыкка килүен булдырмау – тагын да мөһимрәк һәм нәтиҗәлерәк. Китапханәбездә бу темага багышланган «Терроризм – җәмгыять өчен куркыныч» дип исемләнгән китап күргәзмәсе-мәгълүмат эшли. Әлеге күргәзмә материаллары аша китап укучылар терроризмның нәрсә икәнен, аның максатларын, шулай ук террор шартларында үзеңне ничек тотарга кирәклеген белә алачак. Күргәзмәдә китаплар, матбугаттан мәкаләләр һәм истәлекләр тәкъдим ителә. Бу мәгълүматлар катлаулы һәм куркынычлы хәлләрдә дөрес карарлар кабул итәргә, бәла-казадан котылырга, үз гомереңне һәм башкаларның гомерен саклап калырга ярдәм итәчәк.

Телләрне саклау һәм үстерү максатыннан уздырыла торган бу бәйрәм елдан-ел үзенең даирәсен киңәйтә бара. Туган тел бәйрәме һәр халыкның телен, мәдәниятен саклауга үз өлешен кертә. 21 нче февраль көнне Айдар авылы китапханәсендә мәдәният йорты белән берлектә “Жырдай моңлы татар теле”  дигән әдәби батл үткәрелде. Оештыручылар  бәйрәмнең барлыкка килү тарихы турында сөйләделәр, туган телнең рухи куәт һәм бөек байлык булуын билгеләп үттеләр. Чарада катнашучы һәркем татар телен, милли гореф-гадәтләребезне саклап калуга үз өлешен кертте. Туган тел көне кичәсе, сүзләре буталган мәкальләрне җыю, кызыклы сорауларга, табышмакларга җаваплар табу, бирелгән сүзләрдән күбрәк сүзләр ясау, тизәйткечләр, сынамышлар әйтешү, төрле халыкларның шигырьләрен уку белән үрелеп барды. Кичәбез “Сөйләшегез туган телдә, туйганчы сөйләшегез. Тел тудырган шатлыкларны кешегә өләшегез!” күргәзмәсендә урын алган китапларга күзәтү ясау белән тәмамланды.

18 февральдән 21 февральгә кадәр Айдар авылы китапханәсендә «Махсус хәрби операция шигърияте» исемле рухландыргыч шигырь марафоны үткәрелде. Әлеге чара Татарстанда Хәрби батырлык һәм хезмәт фидакарьлеге елы, Россиядә халыклар бердәмлеге елы кысаларында оештырылды. Россия Президенты В.В. Путин билгеләп үткәнчә: «Безнең геройлар махсус хәрби операция барышында чын милләтара бердәмлекнең һәм сугышчан туганлыкның ачык мисалын күрсәтә, сугышта без барыбыз да бер халык икәнлегебезне исбатлый». Марафон махсус хәрби операция темасына багышланып, катнашучыларны тирән хисләр һәм кичерешләр белән сугарылган шигърият дөньясына алып керде. Шигырьләрдә патриотизм, Ватанга мәхәббәт һәм без яшәгән заман турында тирән уйланулар чагылды, аларның күңелләрендә бердәмлек хисләре уятты.

Террор — ул безнең һәрберебезгә турыдан-туры яки читтән кагылучы куркыныч күренеш. Акция кысаларында Айдар авылы китапханәсендә экстремизм һәм терроризм темаларына багышланган аралашу сәгате үткәрелде. Катнашучылар төрле тормыш шартларында кирәк булачак белемнәр алдылар. Әлеге чарада катнашучыларның барысына да куркынычсызлык кагыйдәләре турында “Моны һәркем белергә тиеш!” исемле буклетлар таратылды.

Чарага халык мәдәниятенә кушылырга теләүче гаиләләр җыелды.

20 февраль көнне “Киләчәк” яшьләр үзәгендә Халыкара Туган тел көне уңаеннан “Үлемсез дастаннар кебек моңлы син, туган телем” дип исемләнгән “Сүзләр балкышы” нәфис сүз осталары бәйгесенә йомгак ясау кичәсе үткәрелде.

Әлеге чара яшүсмерләрдә туган телгә һәм башка телләргә карата ихтирам, кызыксыну уяту максатыннан оештырылды. Китапханәче халыкның бай рухи мирасын җылы сүзләр белән тасвирлап, төрле телләрдә яңгыраган шигырьләр аша телгә мәхәббәт һәм хөрмәт тәрбияләүнең әһәмиятен ассызыклады. “Туган тел һәркемнең йөрәгендә кадерле һәм якын булырга тиеш”, - дигән фикерне катнашучылар күңеленә сеңдерде. Чара ахырында укучылар өчен «Тылсымлы, җырлы — Туган тел» исемле китап күргәзмәсенә күзәтү ясалып, телебезнең байлыгы һәм матурлыгы тагын бер кат искәртелде.

Шәдке авылы мәдәният хезмәткәрләре мәктәп белән берлектә «Туган тел — халык җаны» дип исемләнгән танып-белү сәгате оештырдылар. Шәдке урта мәктәбе директоры киңәшчесе Ләйлә Дәүләтшина балаларга туган телнең кеше һәм җәмгыять тормышында тоткан әһәмиятле урыны, тел аша халыкның гореф-гадәтләре, көнкүреше, акылы һәм матурлыгы чагылуы турында җылы итеп сөйләде. Ул шулай ук күпмилләтле илебездә яшәүнең байлыгын һәм бөек рус теленең безне берләштерүче көч булуын ассызыклады. Чара барышында катнашучылар бергәләп мәкальләрне, әйтемнәрне һәм канатлы сүзләрне искә төшереп, телебезнең бай мирасын яңарттылар. Шулай ук «Лингвистик шторм» дип исемләнгән кызыклы өстәл уены уйнадылар.

Шул уңайдан Баландыш авылы китапханәсендә “Туган телнең көче һәм матурлыгы” дип исемләнгән уен-кичә оештырылды. Әлеге чараның төп максаты – халкыбызда туган телгә карата тирән мәхәббәт һәм горурлык хисләре тәрбияләү, телебезнең сафлыгын, матурлыгын һәм аһәңлелеген саклап калу өчен тырышып хезмәт итүнең әһәмиятен аңлату иде. Китапханәче китап күргәзмәсенә күзәтү ясап, укучыларны яңа кайткан китаплар белән таныштырды, татар халык авыз иҗатының бай дөньясына сәяхәт кылдырды, милли гореф-гадәтләребезнең әһәмиятенә тукталды. Кичә барышында “Әйтеп бетер” дип исемләнгән уенда мәкальләр һәм санамышлар яңгырады, шаян сорауларга һәм табышмакларга җаваплар тыңланды.

20 февраль көнне Иске Җөри авылы модель китапханә хезмәткәрләре Олы Теләче башлангыч мәктәбендә Халыкара туган тел көненә багышланган «Туган телем – иркә гөлем» дип исемләнгән викторина үткәрделәр.