ЯҢАЛЫКЛАР

4 май көнне Урта Мишә авыл китапханәсе дә әлеге акциягә кушылды. Китапханәче укучыларга Бөек Ватан сугышы, ул елларда совет халкының батырлыгы турында сөйләде. Укучылар Муса Җәлил, Фатих Кәримнең шигырьләрен укыдылар. Шигырьләр буенча фикер алыштылар, укучылар китапханәченең сорауларына җаваплар бирделәр. Чара “Сугыш кайтавазы эзләреннән” исемле китап күргәзмәсенә күзәтү белән тәмамланды.

Бөек Җиңүнең 79 еллыгы уңаеннан Югары Кибәхуҗа авыл җирлеге  һәм мәдәният йорты хезмәткәрләре тыл ветераннарын  һәм сугыш чоры балаларының өйләренә барып бәйрәм белән котлап, хәлләрен белешеп бүләкләр тапшырдылар.  Аларга сәламәтлек, иминлек, күңел күтәренкелеге теләделәр. Сугыш чоры балалары хезмәткәрләрне шатланып каршы алды. Сугыш һәм сугыштан соңгы авыр ачлык еллары турында алар күз яшьләре аша сөйләделәр, әби-бабаларын, әти-әниләрен, фронтта һәм тылда һәлак булган абый-апаларын искә алдылар. Котлау сүзләре өчен алар җылы сүзләр әйттеләр, акыллы тормыш киңәшләрен бирделәр, аларга игътибар һәм кайгыртучанлык күрсәткәннәре, аларны онытмаулары, хәлләрен белешеп торулары, күңел җылысы бүләк итүләре өчен чын күңелдән рәхмәт әйттеләр.

Иске Җөри авылы модель китапханәсе «Балаларга сугыш турында укыйбыз» XV халыкара акциясенә кушылды. Акция кысаларында китапханәчеләр Иске Җөри урта гомуми белем бирү мәктәбе укучыларына Җиңү көненең әһәмияте, Бөек Ватан сугышы елларында халыкның батырлыгы турында сөйләделәр. Балалар сугыш геройлары турында әсәрләр белән таныштылар һәм укыган әсәрләр турында фикер алыштылар. Китапханәдә «Сугыш турында китаплар укыйбыз» дип исемләнгән китап күргәзмәсе оештырылды. Чара ахырында китапханәчеләр балаларга Бөек Ватан сугышы турында китаплар исемлеген тәкъдим иттеләр.

Беренчеләр хәрәкәте активистлары, Россия бөркетләре мәктәпнең сыйныф җитәкчеләре белән берлектә Бөек Ватан сугышында Җиңүнең 79 еллыгына багышланган «Җиңү тәрәзәләре» һәм "Георгий тасмасы" бөтенроссия акцияләрендә катнаштылар.

Районнын авыл жирлеклэрендэ шэхси затлардагы трактор хэм тагылма арбаларга техник карау бара.

Язлар җитеп, Җиңү көне якынлашкан саен күңелне моң баса, йөрәк сагышка төренә. Чөнки никадәрле югалтулар, ачы кайгылар һәм сынаулар аша бирелгән ул бәйрәм безгә. Без, хәзерге чор балалары, аяз күк йөзе астында, тыныч тормышта яшәвебез белән бәхетлебез. Әби-бабаларыбыз кичергән авырлыкларны башка беркемгә һәм беркайчан күрергә язмасын иде. Шундый теләкләр белән 3 нче май көнне Югары Кибәхуҗа авыл китапханәсендә  балалар арасында “Без тынычлык яклы” дип исемләнгән рәсем ясау бәйгесе үткәрелде. Әлеге чара балаларда халкыбызның үткәненә булган игътибарны үстерүгә һәм Бөек Җиңү көненең әһәмиятен аңлатуга юнәлтелде.

Шармыш авылы китапханәсендә башлангыч сыйныф укучылары өчен Бөтендөнья Кояш көненә багышланган «Һәр биттә Кояш» күргәзмәсе янында әңгәмә уздырылды.

3 нче май көнне Баландыш авыл китапханәсендә "Сугыш турында укылган китап – Җиңү көненә минем бүләк!" дигән акция оештырылды. Чараның төп максаты - балаларны Бөек Ватан сугышы турында китаплар укуга җәлеп итү һәм хәтерне саклау. Китап укучылар белән Г.Әпсәләмов, М. Мәһдиев, М.Җәлил, Ф.Кәрим һ.б. кебек авторларның әсәрләреннән өзекләр укылды.

Бөек Ватан сугышында Җиңүнең 79 еллыгы алдыннан 30 апрель көнне Шәтке  авылы мәдәният хезмәткәрләре Бөек Ватан сугышында һәлак булган авылдашлары истәлегенә куелган һәйкәл  янын  һәм 2 май көнне Мирәтәк авылындагы обелискны  җыештырдылар. Узган елгы коры үләнне, яфракларны җыеп алдылар. Буяу эшләрнен башкарып, агачлар утырттылар. Һәйкәлне төзекләндерү - сугышта  һәлак булганнар  алдында, аларның батырлыгы һәм ныклыгы алдында  хөрмәт. Хезмәт нәтиҗәсен күрү бик күңелле булды, һәркем бу эшкә үз җылысын кертте, һәлак булган сугышчылар һәйкәле янындагы чиста территория тирә-юньдәгеләрне  сөендерә, һәр җирдә чиста һәм матур.

Бөек Җиңү көненә карата 2 нче май көнне Урта Мишә авыл китапханәсендә «Бөек һәм мәңгелек батырлык» дип исемләнгән китап күргәзмәсе эшли башлады. Күргәзмәдә китапханә фондында булган сугыш темасын чагылдырган тарихи һәм әдәби китаплар тәкъдим ителде.